與我分手重新認識自己

分享者：

問：你來自哪裡？
答：火星……喺香港出得梗係香港啦。

問：你什麼時候參加工作假期？
答：2014-2015。

問：你曾到哪裡工作假期？為什麼會選擇那個地方為目的地？
答：澳洲。我一直都鍾意去旅行同冒險，亦都喜歡攝影，其實一直都想去Working Holiday，儲咗幾年錢先去。揀澳洲係因為︰大自然、風景、朋友。

問：在工作假期期間，你曾經做過什麼工作？你又有修讀什麼短期課程嗎？
答：黑工同白工都做過，做過kitchen hand（廚房助手），上咗好多寶貴嘅人生課堂。例如其中一個係切肉過程，基本上以前我除咗份文職，我冇做過其他工。去到澳洲要學切肉，真係好難。咁師父有一次問，係咪我切？我答係，佢就話，如果係出面大廚房，你畀其他師父鬧到狗血淋頭啦！切到唔平均咁點煮！嗰一下我就明白，如果我個崗位做唔好，原來係會影響到其他人。我喺以前份工咩都可以跟到足，但出到嚟就唔係，總有自己做唔到嘅事，所以喺當時就學識呢樣嘢。
亦都做過Receptionist，學識好夠膽咁去講英文（其實係必須）。
做過農場，係白工嚟，亦係搵得最多錢又最好玩！同當地人一齊做嘢打成一片！佢哋又肯教我英文、野外技能。

問：請分享你在工作假期中一個最難忘的經歷。
答：冇咩，因為整個過程已經好難忘，但硬係要揀一個，就係認識到一啲當地好朋友！
其實最難忘應該係喺農場做嘢，同外國人打成一片，冇歧視問題，好好玩，一齊掟紅莓，一齊「蛇王」。有一次主管唔喺度，咁我哋分兩邊做嘢，點知掟得太勁，有個同事同副主管投訴，咁第二日就畀人好認真咁話要好好做嘢唔好再掟，唔係就停職。主管知道後，就當然好認真咁訓話，叫唔好再掟。但私底下佢哋原來話呢啲係Boy's thing佢係唔會理，結果主管路過監工個陣，就係咁掟我哋，笑住叫我哋唔好掟XDDDDD

問：工作假期為你帶來最大的收穫是什麼？
答：睇清楚世界係點，了解到自己有幾細。

問：對於那些打算到你目的地工作假期的青年人，你能否給他們三個貼士？
答：
問：還有沒有什麼是你想補充的？
答：好好享受大自然，澳洲嘅大自然景色真係無與倫比，有時候真係會懷疑自己睇緊個景係真定假。世界好大，珍惜時間，去睇清楚去了解世界各地風土人情，唔好令自己後悔邊度都無去過。

提提你：以上各個參加者的經驗分享乃屬個人意見，並不代表勞工處的立場。工作假期參加者在出發前應做好資料搜集，以取得最新和有效的資訊。

(Chinese version only)