工作假期理想與現實
By
藍橘子 (2013-2014 澳洲)
問：你來自哪裡？
答︰香港。
問：你什麼時候參加工作假期？
答︰2013-2014。
問：你曾到哪裡工作假期？為什麼會選擇那個地方為目的地？
答︰純粹因為較多人選擇去澳洲工作假期，而且我又唔想選擇亞洲地區，因為想感受一下更加唔同嘅生活文化。
問：在工作假期期間，你曾經做過什麼工作？你又有修讀什麼短期課程嗎？
答︰做過好多香港無乜機會做到嘅工種。農場摘豆、摘士多啤梨、剪葡萄枝、杏仁農場……又做過街場賣菜、餐廳侍應……
農場最辛苦係要日曬雨淋，動作要快。例如剪葡萄枝，有啲好似手腕咁粗，每日不停地剪足八個鐘，一星期後手指關節痛到發唔到力，但無計，一定要繼續做。
摘士多啤梨聽落好好玩，香港都有人畀錢入農場摘。但真實嘅士多啤梨農場係需要你每日跪喺地下十個鐘，不停鄔低身摘。
香港人比較少運動，相比起其他地方嚟工作假期嘅人例如台灣，好多人畢業後當兵兩年就去工作假期，香港人體力上會比較輸蝕。
雖然香港都一樣有農場有街市，你可以去體驗。但對方見你咁年輕，街市都未必會請你。
雖然工作好辛苦，但一定要繼續做，因為有工返已經好幸運，屋租、油錢、伙食……一切開支都無得靠其他人，唔似喺香港至少有個屋企可以返。
問：請分享你在工作假期中一個最難忘的經歷。
答︰打完工賺完錢之後，喺後半年大約用咗兩個月時間左右同我女朋友去環澳（我係同我女朋友兩個人去架）。我環澳嘅方式係揸車，諗住沿住個島嘅邊邊，由下面西澳環到去東澳咁樣。去到差唔多最後一站到咗Cairns（凱恩斯），當日參加咗個玩急流撐艇嘅Tour（旅遊團），點知玩完之後，發現架車突然間撻、唔、著呀！
因為當時玩激流嘅地點係個森林咁嘅物體嚟嘅，所以周圍都搵唔到人幫手。其中一個急流教練好好人，帶咗我哋去附近露營嘅地方搵人幫手，佢仲放棄咗跟返自己tour旅遊巴走嘅機會，而係選擇留喺營地救我地走！佢已經係破釜沉舟架喇，如果佢幫唔到我地嘅話就連佢自己都走唔到，因為佢係打算幫我地整完架車之後坐埋我地架車返去佢工作嘅地點。咁最尾喺營地都借到電線，叉得返電，而架車都好好彩，撻得返著！
咁之後諗住冇事啦，因為叉咗電之後，架車理論上係會一路行一路自己叉，咁諗住冇事，點知落到市區喺我同女朋友差唔多返酒店之前，發覺架車……
又再次撻、唔、著！
今次仲要冇咗個教練喎（佢已經走左喇），嗰陣我哋仲要喺路中心呀！我同女朋友完全唔知點算，惟有打晒燈將架車停喺路中心。之後好多人路過都幫手（可能因為我哋阻街啦，哈哈），幫我哋推埋架車去路邊先，又問我哋發生咩事，佢哋又幫我哋繼續借電線咁樣。
我最記得嘅，係個中年女人。
呢位太太落咗車幫我哋搵咗條叉電線，再用另一架車過電落我哋架車度。佢當時停咗喺路邊好耐，同埋佢幫我哋推車個陣，推到成隻腳都係泥，因為推咗上路邊嘅草地，佢成隻腳都畀濕泥整到污糟晒。我同女朋友都好唔好意思，諗住話ok架喇我地自己搞得掂，但佢話︰「唔得！我幫你哋手啦！」就係咁，佢就同我哋一齊喺路邊，一齊截停啲車問吓邊架車有嗰條叉電線。
到最尾都係借到條叉電線嘅，但係喺返酒店嘅路程呢，斷斷續續咁我架車都係……撻唔著。
咁最後一次撻唔著就係，都係喺路中心囉！我同女朋友惟有夾手夾腳推返好啲架車先，但係周圍啲人見到，即使係另一條街或者對頭車嗰啲，佢哋都會泊埋架車喺側邊，跟住跑過嚟幫我哋手。有個西裝友埋嚟睇吓我哋架車咩事，仲幫我哋call咗個整車師傅即刻過嚟整。最後整車師傅話我架車嘅電池直頭壞左，就唔關叉唔叉到電事，要換就要成粒電池換過新嘅。嘩！計過價錢好貴呀，倒不如直接棄咗架車去，將架車好平地賣咗去，賺返啲旅費。
其實Cairns本身唔係我哋最後一站嚟，最後一站係諗住去埋澳洲中間嘅Uluru（烏魯魯），諗住睇吓呢個地球嘅中心咁啦，但因為今次壞車，我哋啲錢又用得七七八八喇，最後都係去唔到。係好遺憾嘅，但係呢件事感觸好大，我同女朋友都冇乜唔開心，因為受過太多人幫助，佢哋幫完你臨走又會講聲Good luck（祝你好運）呀咁，真係覺得好感動呀呢件事，我諗喺香港就難啲遇到呢啲事，好少會有人咁主動離遠衝埋嚟幫你手，所以就好深刻。
問：工作假期為你帶來最大的收穫是什麼？
答︰呢一年工作假期呢，我覺得最大嘅收穫唔係話賺到幾多錢，因為我本身都打算環澳，去完澳洲又會去埋New Zealand（新西蘭），已經諗住會用晒啲錢架喇。所以只不過當頭嗰半年至九個月係用嚟賺個旅費。
咁最大收穫就係覺得——喺澳洲嘅生活好簡單。香港嘅生活都簡單，因為香港人一出世就係儲錢買樓架喇，所以都好簡單架！但係喺澳洲嘅簡單係唔同嘅，過咗嗰邊時嘅目標短期啲，例如你頭半年做嘢係為咗之後去一個旅行，生活變得好簡單。
另一個最大收穫就係呢……可能我個人犯賤，去到一啲外國地方會更加鍾意咗香港。因為覺得香港都唔係咁衰架喎，好多都好好架喎，呢個就係我嘅感覺。
其實返到嚟香港之後，好多人都問我，究竟呢一年賺咗幾多錢。咁或者有啲朋友真係為咗賺錢而去澳洲嘅，我就覺得睇你想點樣賺啦，成世流流長，其實你喺香港都可以賺返同樣嘅錢，唔係去到澳洲先好似掘金咁去賺錢，只不過喺澳洲你少咗娛樂，可以洗少咗錢咁解（咁當然佢時薪就高過香港啦）。咁橫掂喺香港都可以儲到錢嘅，又難得有一年時間去外國接觸唔同嘢，我自己覺得你去感受會好過賺錢。因為有啲人真係慳錢慳到日日食個杯麵食碗麥皮又過一日，同埋佢地即使放假都唔會去邊度玩，為咗慳錢，佢地只會喺間房度玩電腦又過一日。我覺得你呢一年，畀你賺到十萬又點啫？你返到香港就係得呢十萬咋喎。但係我而家賺到一個我成世都記得嘅回憶喎，我覺得係重要過錢。
問：對於那些打算到你目的地工作假期的青年人，你能否給他們三個貼士？
答：
問：還有沒有什麼是你想補充的？
答︰如果你，或者好多年輕人，大學畢業讀完書，又暫時未搵到嘢做，考慮緊到底去唔去working holiday好呢，咁我就其實好鼓勵大家去嘅。因為你去都係一年或者兩年嘅事，到你遲啲先諗，一來過咗個年齡限制啦，二來即使工作假期冇個年齡限制，過咗30歲你嘅現實生活可能唔會容許你咁自由去另一個地方生活一年。你身邊可能有伴侶呀家庭呀，有一筆生活嘅開支喺度，就冇咁容易走架喇。所以你把握住你嘅年輕，去玩一年啦！
同埋，想提醒返大家，唔好對工作假期存在咁多美好嘅幻想。
因為我當年都係睇得多台灣人嗰啲blog啦，就覺得去工作假期好開心咁喎，見到佢地笑咪咪咁影相，好似每日都好好玩咁樣。但其實個現實唔係咁架，只不過台灣人個文化比較樂觀啦，佢哋寫啲嘢成日寫到好好玩咁。但事實係去到做嘢其實好辛苦架，唔係玩玩下摘士多啤梨好開心又過一日，因為摘得慢就會炒你架喇。咁當然辛苦之餘都有好多得著嘅，所以我都好鼓勵大家去，但係就唔好太多幻想喇。
提提你：以上各個參加者的經驗分享乃屬個人意見，並不代表勞工處的立場。工作假期參加者在出發前應做好資料搜集，以取得最新和有效的資訊。
答︰香港。
問：你什麼時候參加工作假期？
答︰2013-2014。
問：你曾到哪裡工作假期？為什麼會選擇那個地方為目的地？
答︰純粹因為較多人選擇去澳洲工作假期，而且我又唔想選擇亞洲地區，因為想感受一下更加唔同嘅生活文化。
問：在工作假期期間，你曾經做過什麼工作？你又有修讀什麼短期課程嗎？
答︰做過好多香港無乜機會做到嘅工種。農場摘豆、摘士多啤梨、剪葡萄枝、杏仁農場……又做過街場賣菜、餐廳侍應……
農場最辛苦係要日曬雨淋，動作要快。例如剪葡萄枝，有啲好似手腕咁粗，每日不停地剪足八個鐘，一星期後手指關節痛到發唔到力，但無計，一定要繼續做。
摘士多啤梨聽落好好玩，香港都有人畀錢入農場摘。但真實嘅士多啤梨農場係需要你每日跪喺地下十個鐘，不停鄔低身摘。
香港人比較少運動，相比起其他地方嚟工作假期嘅人例如台灣，好多人畢業後當兵兩年就去工作假期，香港人體力上會比較輸蝕。
雖然香港都一樣有農場有街市，你可以去體驗。但對方見你咁年輕，街市都未必會請你。
雖然工作好辛苦，但一定要繼續做，因為有工返已經好幸運，屋租、油錢、伙食……一切開支都無得靠其他人，唔似喺香港至少有個屋企可以返。
問：請分享你在工作假期中一個最難忘的經歷。
答︰打完工賺完錢之後，喺後半年大約用咗兩個月時間左右同我女朋友去環澳（我係同我女朋友兩個人去架）。我環澳嘅方式係揸車，諗住沿住個島嘅邊邊，由下面西澳環到去東澳咁樣。去到差唔多最後一站到咗Cairns（凱恩斯），當日參加咗個玩急流撐艇嘅Tour（旅遊團），點知玩完之後，發現架車突然間撻、唔、著呀！
因為當時玩激流嘅地點係個森林咁嘅物體嚟嘅，所以周圍都搵唔到人幫手。其中一個急流教練好好人，帶咗我哋去附近露營嘅地方搵人幫手，佢仲放棄咗跟返自己tour旅遊巴走嘅機會，而係選擇留喺營地救我地走！佢已經係破釜沉舟架喇，如果佢幫唔到我地嘅話就連佢自己都走唔到，因為佢係打算幫我地整完架車之後坐埋我地架車返去佢工作嘅地點。咁最尾喺營地都借到電線，叉得返電，而架車都好好彩，撻得返著！
咁之後諗住冇事啦，因為叉咗電之後，架車理論上係會一路行一路自己叉，咁諗住冇事，點知落到市區喺我同女朋友差唔多返酒店之前，發覺架車……
又再次撻、唔、著！
今次仲要冇咗個教練喎（佢已經走左喇），嗰陣我哋仲要喺路中心呀！我同女朋友完全唔知點算，惟有打晒燈將架車停喺路中心。之後好多人路過都幫手（可能因為我哋阻街啦，哈哈），幫我哋推埋架車去路邊先，又問我哋發生咩事，佢哋又幫我哋繼續借電線咁樣。
我最記得嘅，係個中年女人。
呢位太太落咗車幫我哋搵咗條叉電線，再用另一架車過電落我哋架車度。佢當時停咗喺路邊好耐，同埋佢幫我哋推車個陣，推到成隻腳都係泥，因為推咗上路邊嘅草地，佢成隻腳都畀濕泥整到污糟晒。我同女朋友都好唔好意思，諗住話ok架喇我地自己搞得掂，但佢話︰「唔得！我幫你哋手啦！」就係咁，佢就同我哋一齊喺路邊，一齊截停啲車問吓邊架車有嗰條叉電線。
到最尾都係借到條叉電線嘅，但係喺返酒店嘅路程呢，斷斷續續咁我架車都係……撻唔著。
咁最後一次撻唔著就係，都係喺路中心囉！我同女朋友惟有夾手夾腳推返好啲架車先，但係周圍啲人見到，即使係另一條街或者對頭車嗰啲，佢哋都會泊埋架車喺側邊，跟住跑過嚟幫我哋手。有個西裝友埋嚟睇吓我哋架車咩事，仲幫我哋call咗個整車師傅即刻過嚟整。最後整車師傅話我架車嘅電池直頭壞左，就唔關叉唔叉到電事，要換就要成粒電池換過新嘅。嘩！計過價錢好貴呀，倒不如直接棄咗架車去，將架車好平地賣咗去，賺返啲旅費。
其實Cairns本身唔係我哋最後一站嚟，最後一站係諗住去埋澳洲中間嘅Uluru（烏魯魯），諗住睇吓呢個地球嘅中心咁啦，但因為今次壞車，我哋啲錢又用得七七八八喇，最後都係去唔到。係好遺憾嘅，但係呢件事感觸好大，我同女朋友都冇乜唔開心，因為受過太多人幫助，佢哋幫完你臨走又會講聲Good luck（祝你好運）呀咁，真係覺得好感動呀呢件事，我諗喺香港就難啲遇到呢啲事，好少會有人咁主動離遠衝埋嚟幫你手，所以就好深刻。
問：工作假期為你帶來最大的收穫是什麼？
答︰呢一年工作假期呢，我覺得最大嘅收穫唔係話賺到幾多錢，因為我本身都打算環澳，去完澳洲又會去埋New Zealand（新西蘭），已經諗住會用晒啲錢架喇。所以只不過當頭嗰半年至九個月係用嚟賺個旅費。
咁最大收穫就係覺得——喺澳洲嘅生活好簡單。香港嘅生活都簡單，因為香港人一出世就係儲錢買樓架喇，所以都好簡單架！但係喺澳洲嘅簡單係唔同嘅，過咗嗰邊時嘅目標短期啲，例如你頭半年做嘢係為咗之後去一個旅行，生活變得好簡單。
另一個最大收穫就係呢……可能我個人犯賤，去到一啲外國地方會更加鍾意咗香港。因為覺得香港都唔係咁衰架喎，好多都好好架喎，呢個就係我嘅感覺。
其實返到嚟香港之後，好多人都問我，究竟呢一年賺咗幾多錢。咁或者有啲朋友真係為咗賺錢而去澳洲嘅，我就覺得睇你想點樣賺啦，成世流流長，其實你喺香港都可以賺返同樣嘅錢，唔係去到澳洲先好似掘金咁去賺錢，只不過喺澳洲你少咗娛樂，可以洗少咗錢咁解（咁當然佢時薪就高過香港啦）。咁橫掂喺香港都可以儲到錢嘅，又難得有一年時間去外國接觸唔同嘢，我自己覺得你去感受會好過賺錢。因為有啲人真係慳錢慳到日日食個杯麵食碗麥皮又過一日，同埋佢地即使放假都唔會去邊度玩，為咗慳錢，佢地只會喺間房度玩電腦又過一日。我覺得你呢一年，畀你賺到十萬又點啫？你返到香港就係得呢十萬咋喎。但係我而家賺到一個我成世都記得嘅回憶喎，我覺得係重要過錢。
問：對於那些打算到你目的地工作假期的青年人，你能否給他們三個貼士？
答：
1)
唔好咁快放棄住！有好多人都係嚟到澳洲兩三個月就會走架喇，因為佢哋手頭上啲錢已經用晒，又搵唔到工喎，咁就放棄返返香港。咁其實佢哋呢兩個月係白費架喎。
2)
同埋最要小心嘅係，唔好畀人呃錢。其實澳洲working holiday做嘢呢，有好多都係黑工嚟架。白工就係似我哋平時喺香港返工咁，有少少保障，有醫療保障呀、有最低薪金、有最長工時呀，呢啲叫白工。
3)
咁咩叫黑工呢？黑工係會有個工頭既，例如係一份農場嘅工作啦，農場嗰邊就淨係會同個工頭溝通，等個工頭搵人畀佢，然後個農場主人出糧都淨係出畀工頭，唔會出畀我地。工頭就喺我哋薪水度呢度執一蚊嗰度執一蚊咁去賺錢，當一個工頭睇三四個農場，每個農場十零廿個人，咁你諗下，佢一個鐘每人執一蚊都六七十蚊澳紙一個鐘喇喎。但係跟工頭有一定危險性，因為你哋之間係冇合約架！佢隨時會走數架！佢可以直情唔出糧跟住熄電話，你根本就冇辦法搵到佢。聽過有個工頭拎晒啲錢賭錢，輸晒就搬去另一間屋照搵另一批人返工，繼續營運佢嘅農場，但你地啲人工佢就全部走晒數喇。呢個要小心，但現實就係好難搵到白工，因為好多農場或者工場都畀黑工工頭佔據晒。咁惟有追緊啲糧呀租金呀押金呀，熟知吓個工頭住邊知佢電話號碼，你就會容易啲追。
問：還有沒有什麼是你想補充的？
答︰如果你，或者好多年輕人，大學畢業讀完書，又暫時未搵到嘢做，考慮緊到底去唔去working holiday好呢，咁我就其實好鼓勵大家去嘅。因為你去都係一年或者兩年嘅事，到你遲啲先諗，一來過咗個年齡限制啦，二來即使工作假期冇個年齡限制，過咗30歲你嘅現實生活可能唔會容許你咁自由去另一個地方生活一年。你身邊可能有伴侶呀家庭呀，有一筆生活嘅開支喺度，就冇咁容易走架喇。所以你把握住你嘅年輕，去玩一年啦！
同埋，想提醒返大家，唔好對工作假期存在咁多美好嘅幻想。
因為我當年都係睇得多台灣人嗰啲blog啦，就覺得去工作假期好開心咁喎，見到佢地笑咪咪咁影相，好似每日都好好玩咁樣。但其實個現實唔係咁架，只不過台灣人個文化比較樂觀啦，佢哋寫啲嘢成日寫到好好玩咁。但事實係去到做嘢其實好辛苦架，唔係玩玩下摘士多啤梨好開心又過一日，因為摘得慢就會炒你架喇。咁當然辛苦之餘都有好多得著嘅，所以我都好鼓勵大家去，但係就唔好太多幻想喇。
提提你：以上各個參加者的經驗分享乃屬個人意見，並不代表勞工處的立場。工作假期參加者在出發前應做好資料搜集，以取得最新和有效的資訊。
(Chinese version only)