夢想成真

By

問：你來自哪裡？
答：火星……喺香港出得梗係香港啦。

問：你什麼時候參加工作假期？
答：2015-2016。

問：你曾到哪裡工作假期？為什麼會選擇那個地方為目的地？
答：我喺2015年喺澳洲工作假期期間，香港同奧地利就簽署咗工作假期協議，喺2015年生效。奧地利係我嘅夢想，所以我一完咗澳洲工作假期，就即刻緊接去埋奧地利工作假期。《Before Sunset》係一部我好鍾意嘅電影，故事取景於維也納，所以因為呢部電影，我一直都好想去維也納。

問：在工作假期期間，你曾經做過什麼工作？你又有修讀什麼短期課程嗎？
答：喺奧地利期間，我一直都逗留喺維也納，並喺一間Hostel打工換宿。原來真係好快樂，我喺個度學識生活簡單有幾快樂。另外，亦喺當地讀過一個月嘅德文A1-1課程。

問：請分享你在工作假期中一個最難忘的經歷。
答：喺奧地利有一個好靚嘅地方叫Hallstatt（哈爾施塔特），但係嗰邊住好貴，咁我就揀咗住喺一個火車站前叫Bad Goisern（巴德哥依斯恩）嘅市鎮，住咗七日。去到唔識開火車門，搞到miss咗個站，要坐返轉頭。
有一日，我想去影日出同埋湖上面起霧個景，咁半夜冇車冇巴士，我又唔識踩單車，咁只有行啦。就係咁樣沿住條公路行，凌晨兩點出發，一行就行咗兩個幾鐘……影完返到去，老闆同老闆娘同我講︰「你係咪傻架？！」
佢哋好Nice，喺嗰幾日係咁教我有咩玩同去邊玩，除咗Hallstatt，仲去咗一條叫Obertraun（特勞恩）嘅村莊玩，真係靚到不得了︰藍天白雲、高山，又舒服！原來老闆仲要係Obertraun纜車站兼職售票員，再送張免費飛畀我上去玩多日。咁諗住過兩日上去，前嗰晚天氣好涼，第二朝起身，老闆話山上落雪，但明明前日仲藍天白雲喎？！到我真係上到去，其實真係完全唔信——大霧又成地雪，真係完全係另一個世界，但講梗只係兩日！

問：工作假期為你帶來最大的收穫是什麼？
答：因為之前去澳洲Working Holiday係同ex一齊，被照顧都幾多；今次去奧地利就自己一個去，其實真係好大膽咁去行每一段路，冇女朋友喺身邊可以更大膽去試同玩。

問：對於那些打算到你目的地工作假期的青年人，你能否給他們三個貼士？
答：
問：還有沒有什麼是你想補充的？
答：世界好大，唔好以自己為中心，放低自己所認識，去接受去學習新事物。睇下其他國家或者地區嘅文化，認識到自己生活其實好富庶，到時就會明白，自己追求嘅係咩嘢。

提提你：以上各個參加者的經驗分享乃屬個人意見，並不代表勞工處的立場。工作假期參加者在出發前應做好資料搜集，以取得最新和有效的資訊。

(Chinese version only)